Moita cor, olladas femininas, novidade de formatos coma o videoxogo de Conrad Roset e artistas importantes do panorama internacional. Prende o ollo en Abi Castillo, Agathe Sorlet, Coco Dávez... e moito máis nesta MiiC 3.
Moi perto de nós temos a Biblioteca de Montealto, a biblioteca do noso barrio, que conta con sala infantil e xuvenil e sala de lectura de adultos, así como con zona de conexión wifi e ordenadores.
Compartimos convosco as súas últimas adquisicións, as do mes de decembro. Atoparedes entre elas algúns dos libros de lectura obrigatoria para as vosas clases.
A continuación delas podedes ver tamén unha guía de libros con ideas para mercar agasallos de Nadal, clasificados por idades que pode resultar moi útil para as familias.
Un ano máis, o Equipo de Dinamización da Lingua Galega, en colaboración co Equipo da Biblioteca, convoca o concurso para elaborar un marcador de libros. Aquí tedes as bases para participar. Animádevos!
Recibimos uns adornos de Nadal preciosos e sobre todo moi creativos!
Grazas ao alumnado e profesorado que participastes cos vosos grupos ou pola vosa conta.
Grazas aos grupos de Apoio de 2º ESO B con Ángeles, Tecnoloxía de 2º ESO A con Rebeca, Valores Éticos de 1º ESO B con Xisela e Volume de 1º de BAC con Juan.
Grazas ás profesoras que sacastes o mellor de vós e tempo de onde non o temos, nestes días tan ocupados, para sumarvos cos vosos talentos e as vosas ideas.
E grazas por colaborar co Equipo da Biblioteca a todos os que botastes unha man á hora de colocalos.
Compartimos con vós unha interesante canle de Youtube, Academia Play, un innovador proxecto educativo, especializado en formación, aprendizaxe, entretemento e educación gratuíta en vídeos de 1 a 15 minutos.
Academia Play é unha plataforma interactiva que nace como un ambicioso proxecto educativo baseado na formación a través do formato audiovisual. Mediante breves vídeos de carácter didáctico expóñense feitos históricos, curiosidades, temas de actualidade, cinema, arte, deporte, música ou ciencia. Especializánse en vídeos de Historia, pero atoparás máis cousas nesta canle.
Este ano non podemos elaborar unha árbore de Nadal como ás que nos tiña acostumados a nosa antiga compañeira Laura Molina, pero desde o Equipo da Biblioteca non queriamos deixar de adornar o centro con algo feito entre todos. E isto é o que argallamos!
Grazas ao alumnado, como os grupos de Tecnoloxía de 2º ESO A, de Apoio de 2º de ESO, Volume de 1º de Bacharelato, de Valores Éticos de 1º de ESO..., á maña para as manualidades dalgúns compañeiros e compañeiras profes e ás mans axudantes de conserxes e limpadoras, o espírito de Adormideras e o de Nadal acompáñanos desde a entrada do instituto un ano máis.
A galega Alba Cid ven de acadar o importante Premio Nacional de Poesía Joven 2020 pola súa obra Atlas (Galaxia). O xurado do premio, concedido polo Ministerio de Cultura e Deporte e dotado con 20.000 euros, considera que a obra constrúe "unha reflexión sobre como a literatura elabora mapas da realidade e sobre o valor moral que pode ter a literatura como problematización do mundo. É poesía tanto do coñecemento como da emoción, e presenta unha nova cartografía na que se funden o mapa do corpo co do planeta, a memoria e o enigma”. Á súa vez, tamén destacou que é unha obra “escrita coa lóxica do asombro e chea de referencias culturais que se contemplan desde unha mirada excéntrica que fermenta en rebeldía”.
Cid é poeta e investigadora en poesía contemporánea. Estudou Filoloxía Galega na Universidade de Santiago. Participou en volumes como Poética dá casa (2006) e na antoloxía de Apiario Non seu despregar (2016). Publica textos de creación e recensións en revistas como Graal, Luzes, Tempos Novos e Dorna, (de cuxo consello de redacción forma parte) e é colaboradora de Radio Galega. Ao longo da súa traxectoria gañou o Rosalía de Castro de Cornellà (2006, 2008) e o Minerva (2007), entre outros galardóns. Os seus poemas foron traducidos ao castelán, grego, inglés e portugués, e apareceron en Oculta Lit, The Offing e Poem-a- Day, unha serie web da Academy of American Poets. Actualmente está a cargo do Centro John Rutherford de Estudos Galegos da Universidade de Oxford.
