Compartimos os traballos realizados por alumnado da materia de Cultura Científica de 1º de Bacharelato, coa profesora Natalia, arredor do tema "Propagando odio".
Durante o pasado mes, puidemos gozar na nosa zona de exposicións dunha seleción de libros e películas seleccionados polo Departamento de Latín e Grego, relacionados coa cultura clásica, a mitoloxía, a vida na antiga Grecia, Roma, Exipto... Non debemos esquecer a fonte da nosa cultura e do noso coñecemento. A través de @sosclasicas nas redes sociais, podedes coñecer moito máis sobre este apaixoante mundo.
A semana do 17 de maio conmemoramos as Letras Galegas a través dunha exposición sobre o autor homenaxeado, Florencio Delgado Gurriarán, nunha proposta conxunta do EDLG e o da Biblioteca. Tamén tivemos mesas de libros de agasallo, que colocaron moi ben as nosas voluntarias Elba, Rosalía, Carmen e Celia.
Unha das actividades que máis ilusión nos fixo este ano foi a asistencia das nosas voluntarias Elba e Carmen á presentación do libro Malas mujeres, de María Hesse. Tivo lugar na libraría Bululú e a ilustradora e escritora estivo acompañada no coloquio por David Pintor.
Por fin temos colocadas na parede longa os andeis que nos chegaron desde a Consellería. Grazas a Fernando e a algunhas mans máis que nos axudaron, conseguimos ter todo colocado rapidísimo. Agora, a agardar a completar o resto da parede!
